ഇന്നത്തെ കാലത്ത് ബന്ധങ്ങൾ കാത്തുസൂക്ഷിക്കാൻ വലിയ പ്രയാസമാണ്. ജീവിത സാഹചര്യവും തിരക്കും എല്ലാം ചേർന്ന് ബന്ധങ്ങൾ പരിപാലിക്കാൻ ആളുകൾക്ക് പ്രയാസമാണ്. എന്നാൽ ചിലരെ കണ്ടിട്ടില്ലേ, എഴുപതാം വയസിലും പ്രണയത്തിനും കുസൃതിക്കും ഒട്ടും കുറവുണ്ടാകില്ല. ഇത്തരം ബന്ധങ്ങൾ കണ്ട് അസൂയപ്പെടാറാണ് ഇന്നത്തെ തലമുറ ചെയ്യുന്നത്. എന്നാൽ ഒന്ന് ശ്രമിച്ചാൽ ആരോഗ്യകരമായ ബന്ധം പരിപാലിക്കാൻ വളരെ എളുപ്പമാണ്.

ആത്മാർത്ഥതയാണ് അടിസ്ഥാനപരമായി വേണ്ടത്. എല്ലാം തുറന്ന് പറയാനും ഈ ബന്ധം എന്നും നിലനിൽക്കണമെന്നും പങ്കാളികൾ ആത്മാർത്ഥമായി ആഗ്രഹിക്കണം. പരസ്പരം കുറവുകൾ അംഗീകരിച്ച് കുറ്റപ്പെടുത്താതെ മുന്നോട്ട് പോയാൽ ജീവിതം ഹാപ്പിയാണ്.

വിട്ടുവീഴ്ചയാണ് മറ്റൊരു പ്രധാന കാര്യം. ചിലർ അതിനെ ത്യജിക്കുക എന്ന് പറയും. പക്ഷേ ഏറ്റവും പ്രധാനമായി വേണ്ട ഒരു ഗുണം തന്നെയാണിത്. ചില കാര്യങ്ങളിൽ അഭിപ്രായ വ്യത്യാസമുണ്ടാകാം.പക്ഷേ അത് ഉൾക്കൊണ്ട്‌ പരസ്പരം ക്ഷമിക്കാനും തീരുമാനങ്ങളിൽ ഒന്നിച്ചു നിൽക്കാനും വിട്ടുവീഴ്ചയിലൂടെയേ സാധിക്കു.

പങ്കുവയ്ക്കൽ ആണ് മറ്റൊന്ന്. എല്ലാ പേടികളും വികാര വിചാരങ്ങളും തുറന്ന് പറയണം. ഒരാൾ ഒരാൾക്ക് താങ്ങാവണം. എല്ലാം പങ്കുവയ്ക്കപ്പെടുമ്പോൾ ബന്ധത്തിന്റെ ദൃഢതയും കൂടും.

ഒന്നിച്ചിരിക്കാൻ ഇത്തിരിനേരം കണ്ടെത്തണം. അത് ഒന്നിച്ച് ടെലിവിഷൻ കാണുക എന്നതല്ല. ഒരു കോഫിയൊക്കെ കുടിച്ച് സ്വസ്ഥമായിരുന്നു പരസ്പരം മനസ് തുറന്ന് സംസാരിക്കണം.അത് ഒന്നിച്ച് പാചകം ചെയ്‌തോ, ഒരു സായാഹ്‌ന നടത്തിലൂടെയോ കുറച്ച് സമയം പങ്കുവയ്ക്കാൻ ശ്രമിക്കണം.

സമൂഹമാധ്യമങ്ങളിൽ നിന്നും അകലം പാലിക്കാം. പങ്കാളിക്കൊപ്പമിരിക്കുമ്പോൾ ഫേസ്ബുക്ക്, വാട്സാപ്പ് തുടങ്ങിയവയൊന്നും ഉപയോഗിക്കാതിരിക്കുക.

ഒന്നിച്ചിരിക്കുക എന്നതുപോലെ ഒന്നിച്ചൊരു യാത്രയ്ക്കോ പുറത്തേക്കൊരു ഡിന്നർ സമയമോ ഒക്കെ മാറ്റിവയ്ക്കാം.

മറ്റൊന്നു രസകരമായ സ്വകാര്യ നിമിഷങ്ങൾ സൃഷ്ടിക്കുക. തിരക്കിനിടയിൽ ഒരു മെസ്സേജ് പങ്കാളിക്ക് അയക്കുക.. പഴയ കാര്യങ്ങൾ പങ്കുവയ്ക്കുക.. നിങ്ങളുടേതായ ചില നിമിഷങ്ങൾ ഇങ്ങനെ സൃഷ്ടിക്കാം.

പരസ്പരം ഒരുപാട് ആശ്രയിക്കുന്നതിനൊപ്പം സ്വന്തമായൊരിടം പങ്കാളിക്ക് നൽകുക. അതായത് പേഴ്‌സണൽ സ്പേസ് നൽകുക. അത് ഒരാളുടെ സ്വാതന്ത്ര്യമാണ്, അവകാശമാണ്.അതിനെ ബഹുമാനിക്കുക.