ജന്മനാ കഴിവുള്ളവർക്ക് മാത്രമേ കൂടുതൽ സ്മാർട്ട് ആയി ജീവിതത്തെ അഭിമുഖീകരിക്കാൻ സാധിക്കൂ എന്നൊരു തെറ്റായ ധാരണ ചിലരിലുണ്ട്. ജനനം കൊണ്ട് കഴിവുള്ളവർ ഉണ്ട്, അതുപോലെ കഴിവുകൾ ആർജിച്ചെടുക്കാനും സാധിക്കും. നിങ്ങളുടെ  വൈജ്ഞാനിക കഴിവുകൾ വർദ്ധിപ്പിക്കുന്നതിനും വിവിധ പ്രൊഫഷണൽ, വ്യക്തിഗത പ്രവർത്തനങ്ങൾ  ഫലപ്രദമാകുന്നതിനും നിരവധി മാർഗ്ഗങ്ങളുണ്ട്.

ജീവിതത്തിൽ മുന്നോട്ടുള്ള പ്രചോദനവും ദൃഢനിശ്ചയവും ഉണ്ടെങ്കിൽ ആർക്കും സ്വന്തം കഴിവിനെയും അറിവിനെയും വികസിപ്പിച്ച് കൂടുതൽ ചുറുചുറുക്കുള്ളവരാകാം. നിങ്ങളുടെ പതിവ് ശീലങ്ങളിലേക്ക് ചിലതൊക്കെ കൂട്ടിച്ചേർത്താൽ മാത്രം മതി. ആരും പറയും, എന്തൊരു സ്മാർട്ട് എന്ന്. 

പൂർണ്ണമായ ശാരീരിക ആരോഗ്യത്തിൽ മസ്തിഷ്ക ആരോഗ്യം( BRAIN HEALTH)  ഒരു പ്രധാന ഘടകമാണ്. ഈ ആരോഗ്യം കാത്തുസൂക്ഷിച്ചാൽ നിങ്ങൾക്ക് ചുറുചുറുക്കുള്ള വ്യക്തിത്വം സ്വന്തമാക്കാം. 

പുതിയ സ്ഥലങ്ങൾ സന്ദർശിക്കുന്നത് ശീലമാക്കുക. അതായത് ഒരു ട്രിപ്പ് എന്നല്ല. പുതിയൊരു കോഫി ഷോപ്പിൽ പോകുന്നതും മറ്റുമെല്ലാം ഒരു ശീലമാണ്. അല്ലെങ്കിൽ മറ്റൊരു രാജ്യത്തേക്ക് പോകുക, പുതിയൊരിടത്ത് പഠിക്കുക, ജോലി ചെയ്യുക. സാധാരണഗതിയിൽ ഇത് തുടക്കത്തിൽ ചില ബുദ്ധിമുട്ടുകൾ ഉണ്ടാക്കും. പക്ഷെ പുതിയതിനെ പരീക്ഷിക്കാൻ ശ്രമിക്കുക. 

ഇത് ലളിതമാണെന്ന് തോന്നുമെങ്കിലും നിങ്ങൾ ഒരു പുതിയ രാജ്യത്തേക്ക് പോകുമ്പോൾ, ഭാഷ വ്യത്യസ്തമാണ് ആചാരങ്ങൾ അപരിചിതമാണ്, സംസ്കാരം മറ്റൊന്നാണ്. അപ്പോൾ ആ വെല്ലുവിളി സ്വീകരിക്കാൻ തലച്ചോറ്  തയ്യാറാകും.ഇത് നിങ്ങളിൽ വരുത്തുന്ന മാറ്റങ്ങൾ ചെറുതല്ല. 

എത്ര മുതിർന്നാലും ഉള്ളിൽ ഒരു വിദ്യാർത്ഥി ആയിരിക്കുക. നിങ്ങളുടെ വിദ്യാഭ്യാസം തുടരുക
കുട്ടിക്കാലത്തും കൗമാരത്തിലും  വിദ്യാഭ്യാസം വിലപ്പെട്ടതാണെങ്കിലും മുതിർന്നു കഴിയുമ്പോൾ അതിന്റെ ആവശ്യമില്ലെന്നു ആളുകൾ ചിന്തിക്കും. നിങ്ങൾ പുതിയതായി എന്തെങ്കിലും പഠിച്ചുകൊണ്ടേ ഇരിക്കുക. 
അക്കാദമിക് അല്ലെങ്കിൽ ക്രിയേറ്റീവ് ആയി എന്തെങ്കിലും പഠിക്കാൻ സ്വയം ശ്രമിക്കുക.

വാർത്തകളിലൂടെ എപ്പോഴും പുതുമകൾ അറിഞ്ഞുകൊണ്ട് ഇരിക്കുക. ഒരു പത്രം വായിക്കാനോ വാർത്തകൾ കാണാനോ എല്ലാ ദിവസവും രാവിലെയും വൈകുന്നേരവും അര മണിക്കൂർ നീക്കിവയ്ക്കുന്നത് നിങ്ങളുടെ തലച്ചോർ സജീവമായി തുടരാൻ സഹായിക്കും.പുതിയ വിവരങ്ങൾ അറിയുന്നത്  ഒരു നല്ല ദൈനംദിന ശീലമാണ്. 

വായിക്കുക. മസ്തിഷ്ക പ്രവർത്തനങ്ങൾ സുഗമമാക്കുന്നതിനുള്ള ഏറ്റവും അടിസ്ഥാന മാർഗ്ഗം വായനയാണ്. നിങ്ങളുടെ ബുദ്ധിയുടെ ശേഷി വായന വർധിപ്പിക്കും. 

ഒരു പ്രശ്നം വരുമ്പോൾ എപ്പോഴും ആവലാതിപ്പെടാതെ ചോദ്യങ്ങൾ ചോദിക്കുക. ചോദ്യം ചോദിക്കുന്നത് ഉത്തരം കണ്ടെത്താൻ തലച്ചോറിനെ പ്രേരിപ്പിക്കുന്നു. പ്രശ്നത്തെക്കുറിച്ച് വേവലാതിപ്പെടുന്നതിനുപകരം, എന്തുകൊണ്ടെന്ന് സ്വയം ചോദിച്ച് ചിന്തിക്കുക. 

ടെക്‌നോളജി വളരെയധികം നമ്മളെ സഹായിക്കുന്നുണ്ട്. പക്ഷെ ഒരുതരത്തിൽ തീർത്തും കഴിവുകെട്ടവരുമാക്കുന്നു. ജി പി എസ് സഹായമില്ലാതെ ഒരു യാത്ര പോകുക, കാൽക്കുലേറ്റർ ഇല്ലാതെ മനക്കണക്ക് കൂട്ടുക, ഇതിലൂടെയെല്ലാം നിങ്ങൾ തലച്ചോറിനെ പ്രവർത്തിപ്പിക്കു.. ചിന്ത ശേഷി വർധിക്കുമ്പോൾ സ്വയം സ്മാർട്ട് ആകും. 

സർഗ്ഗാത്മകത വളർത്തുക. ദൈനംദിന ജോലികളുടെ ഇടവേളയിൽ നിങ്ങളുടെ  സർഗ്ഗാത്മകതയെ ഉൾപ്പെടുത്താനുള്ള വഴികൾ കണ്ടെത്തുക. ഇത്തരം പ്രവർത്തികൾ തലച്ചോറിന് കൂടുതൽ ഉന്മേഷം നൽകും. 

വരയ്ക്കുക. അതിനു നിങ്ങൾ ഒരു കലാകാരനാകേണ്ടതില്ല. ഇതെല്ലാം തലച്ചോറിന് ഉണർവ്വ് നൽകുന്ന പ്രവർത്തികൾ ആണ്. അതുപോലെ എഴുതുക. വായന പോലെ, എഴുത്തും  തലച്ചോറിന്റെ വികാസത്തിന് സഹായിക്കുന്നു. 

മറ്റുള്ളവരുമായി വിവരങ്ങൾ  പങ്കിടുകയും ചർച്ച ചെയ്യുകയും ചെയ്യുന്നത് വളരെ മികച്ച ഒരു രീതിയാണ്. 
അതിനായി ഇത്തരം കാര്യങ്ങളിൽ താല്പര്യമുള്ള സഹപ്രവർത്തകരെയും സമപ്രായക്കാരെയും  കണ്ടെത്തുക. ഇതിനപ്പുറം സ്വയം നമുക്ക് സ്മാർട്ട്  ആകാൻ ഒരുപാട് ഒരുപാട് കാര്യങ്ങൾ ഉണ്ട്. ഓരോരുത്തരിലും ഇത് വ്യത്യസ്തമായിരിക്കുമെന്നു മാത്രം.