ആകെ കുഴപ്പംപിടിച്ചൊരു ജീവിതം.. മുഴുവൻ വയ്യാവേലികൾ.. ഇതൊക്കെ ചിലരുടെ ജീവിതത്തിന്റെ  ഭാഗമാണ്. ജന്മ ദോഷമെന്നോ, സമയ ദോഷമെന്നോ ആരുടെയെങ്കിലും ശാപം എന്നോ ഒക്കെ പറഞ്ഞു നിങ്ങൾ അതിൽ ആശ്വാസം കണ്ടെത്താൻ ശ്രമിക്കും. ശരിക്കും ഇതൊരു ശാപം തന്നെയാണ്. നല്ലൊരു ജീവിതം മുന്നിലുണ്ട്, എന്നിട്ടും നശിപ്പിച്ചു കളയുന്നതോർത്ത് സ്വന്തം മനസാക്ഷി ശപിക്കുന്നു എന്ന് വേണമെങ്കിൽ പറയാം. ജീവിതരീതി, നെഗറ്റീവ് മാനസികാവസ്ഥ, മോശം  ശീലങ്ങൾ, ഇവയിലൂടെയൊക്കെ ബോധ പൂർവം അല്ലെങ്കിൽ പോലും ഒരു നാശം പിടിച്ച ജീവിതം എന്നൊക്കെ പറയുന്ന അവസ്ഥ ഉണ്ടാകുന്നു. 

ജീവിതത്തിലെ വളർച്ചയുടെ പാത തടസപ്പെടുത്തുന്ന  മോശം ശീലങ്ങൾ നമുക്കെല്ലാവർക്കും ഉണ്ട്. എന്നാൽ നിങ്ങളുടെ ജീവിതനിലവാരം ഉയർത്തുന്നതിനായി ഈ മോശം ശീലങ്ങളെ ഇല്ലാതാക്കാൻ ഒരിക്കലും വൈകരുത്.

ജീവിതനിലവാരം മോശമാക്കുന്ന നിരന്തരമായ പ്രവർത്തനങ്ങളാണ് മോശം ശീലങ്ങൾ; അത് മാനസികമായും ശാരീരികമായും ആത്മീയമായും ആകാം. തുടർച്ചയായി പരാജയങ്ങൾ മാത്രം നേരിടുമ്പോൾ ശീലങ്ങൾ മാറ്റിപിടിക്കാൻ ശ്രമിച്ചാൽ മതി..ഒരു നല്ല ജീവിതം മുന്നിലുണ്ട്. 

ഈ മോശം ശീലങ്ങൾ‌ ദിവസവും ചെയ്യുന്ന ചില ചെറിയ കാര്യങ്ങളാകാം; അവ തകർക്കാൻ പ്രയാസമാണെങ്കിലും സാധ്യമായ ഒന്നാണ് എന്നതാണ് സത്യം. ഈ മോശം ശീലങ്ങൾ‌ നിങ്ങൾ‌ ഇല്ലാതാക്കുകയാണെങ്കിൽ‌,  ചുറ്റുപാടിനെ ആശ്രയിക്കാതെ സ്വയം ചില കാര്യങ്ങൾ തീരുമാനിക്കേണ്ടതുണ്ട്.അത്കൊണ്ട് നിങ്ങൾ മാറ്റി വയ്‌ക്കേണ്ട ആ പത്തു ശീലങ്ങൾ ഇതൊക്കെയാണ്. 

 താരതമ്യം ചെയ്യുന്നത് അവസാനിപ്പിക്കണം. മറ്റുള്ളവരുടെ നേട്ടങ്ങളിൽ അസൂയപ്പെടുകയും സ്വയം ഒന്നും നേടാൻ പരിശ്രമിക്കാതെയും കുറവുകളും കുറ്റങ്ങളും താരതമ്യം ചെയ്തുകൊണ്ടിരുന്നാൽ അങ്ങനെ തന്നെ തുടരാം. താരതമ്യപ്പെടുത്തുന്ന ഈ മോശം ശീലം അയോഗ്യത, പരിപൂർണ്ണത, സ്വയം വിമർശനം, തീവ്രമായ അസ്വസ്ഥത, ഏകാന്തത, ഒളിച്ചോട്ടം , മറ്റുള്ളവരോട് ചാടിക്കയറുക തുടങ്ങിയ മോശം കാര്യങ്ങളിലെ അവസാനിക്കൂ. 

പിന്തിരിപ്പൻ ചിന്താഗതികൾ അവസാനിപ്പിക്കണം. നമ്മുടെ ചിന്തകൾ നമ്മുടെ മാനസികവും ബൗദ്ധികവുമായുള്ള വികസനത്തിനും മെച്ചപ്പെടുത്തലിനുമുള്ള ഒരു മാർഗമാണ്. സ്വാഭാവികമായും ചിന്തകൾ നല്ലതിനും ചീത്തയ്ക്കും വേണ്ടി സംഭവിക്കും. ചിന്തയ്ക്ക് ഒരു നെഗറ്റീവിറ്റി വന്നാൽ  അത് മോശം ശീലമാണ്. നെഗറ്റീവിറ്റി ഉള്ളവർക്ക്  സാധാരണയായി ആത്മാഭിമാനം കുറവാണ്, അവർക്ക് തങ്ങളെക്കുറിച്ച് തന്നെ മോശമായി തോന്നും. 

അനാരോഗ്യകരമായ ദിനചര്യകൾ മാറ്റുക. നമ്മൾ ആവർത്തിച്ച് ചെയ്യുന്നതെന്തും  ഒരു ശീലമാണ്. നിരന്തരം പരിശീലിക്കുന്ന ദിനചര്യകൾ‌ നമ്മുടെ ജീവിതത്തിൽ‌ വലിയ സ്വാധീനം ചെലുത്തുന്നു. ഉണരുമ്പോഴേ ആദ്യം ഫോൺ  പരിശോധിക്കുക, അമിതമായി  പഞ്ചസാര കഴിക്കുക, സോഷ്യൽ മീഡിയയിൽ വളരെയധികം സമയം ചെലവഴിക്കുക, അമിതമായ ധൂർത്ത് ,  വെള്ളം കുടിക്കാതിരിക്കുക, നിങ്ങളുടെ വികാരങ്ങളെ അവഗണിക്കുക തുടങ്ങിയ മോശം ശീലങ്ങൾ  ദിനചര്യയുടെ ഭാഗമാണ്. ഇതൊക്കെ മാറ്റി ഒരു തെളിമയുള്ള മനസോടെ ഉണരാൻ ശ്രമിക്കുക. നേരത്തെ ഉണരുക. ഫോൺ ആദ്യം തന്നെ  ഒഴിവാക്കുക. നടത്തവും വ്യായാമവും ഉൾപ്പെടുത്തുക. പ്രഭാതഭക്ഷണം ഒഴിവാക്കരുത്. അങ്ങനെ നല്ലൊരു പ്രഭാതം തുടങ്ങു.

വ്യക്തികളിൽ നിന്നും ജോലി സ്ഥലത്തുനിന്നുമൊക്കെ അംഗീകാരങ്ങൾ ലഭിക്കാൻ  ആഗ്രഹിക്കാറുണ്ട് നമ്മൾ. അത് തെറ്റായ പ്രവണതയാണ്. ഈ മോശം ശീലം നമ്മുടെ ജീവിതത്തിന്റെ സന്തോഷവും ഗുണനിലവാരവും ഇല്ലാതാക്കും. ഈ ശീലം നിർത്തണം. സ്വയമുള്ള തൃപ്തിയിൽ വിശ്വസിക്കണം. മറ്റുള്ളവരെ കാണിക്കാനായി മാത്രം വെറും പ്രകടനങ്ങളായി മാറരുത് ജീവിതം. 

സ്വന്തം പ്രവർത്തികളിൽ തന്നെ ഒരു വിശ്വാസമില്ലാതെ മറ്റുള്ളവർ എന്തുചെയ്യുന്നു അതിനെ പിന്തുടരുന്ന സ്വഭാവക്കാരുണ്ട്. മറ്റുള്ളവർ‌ നിങ്ങളെക്കുറിച്ച് എന്തു വിചാരിക്കുന്നുവെന്നതിനെക്കുറിച്ച് നിങ്ങൾ‌ വളരെയധികം ശ്രദ്ധാലുവായിരിക്കുക, മറ്റുള്ളവരെ തൃപ്തിപ്പെടുത്താൻ മാത്രം ജീവിക്കുക, സ്വയം ഒരു വിലയിരുത്തലില്ലാത്ത ഇത്തരം സ്വഭാവങ്ങൾ മോശം ശീലങ്ങളിൽ പ്രധാനമാണ്. 

ജീവിതത്തിൽ ഒന്നും പൂർണമല്ല. അതായത് ആരും പെർഫെക്റ്റ് അല്ല. അപൂർണതയ്ക്ക് അതിന്റെതായ സൗന്ദര്യമുണ്ട്. നമ്മൾ കുറവുകളെ അംഗീകരിക്കണം. പെർഫെക്ഷൻ എന്നത് ഒരു ധാരണ മാത്രമാണ് എന്ന് മനസിലാക്കുക. ഇപ്പോഴും പൂർണത തേടിയാൽ ഒരു തൃപ്തി ഒന്നിലും ഉണ്ടാകില്ല. നിരാശയിലേക്ക് അത് തള്ളിയിടുകയും ചെയ്യും. 

ഇത്തരം ഒട്ടേറെ മോശം ശീലങ്ങൾ പലരുടെയും ജീവിതത്തിൽ ഉണ്ട്. ഒന്നിനോടും പൊരുത്തപ്പെടാത്ത ഇത്തരം ശീലങ്ങൾ നിങ്ങളുടെ ജീവിത നിലവാരത്തെ ബാധിക്കും. അതിനാൽ ഇനിയും ബാക്കിയുള്ള സമയത്തിൽ ഈ ശീലങ്ങളെ ആട്ടിപ്പായിക്കൂ..