വേനൽ സമയത്ത് ശരീരത്തിന് ഒരുപാട് ശ്രദ്ധയും കരുതലും നൽകണം. കാരണം ജലാംശം ഒരുപാട് പുറന്തള്ളപ്പെടുകയും അസുഖങ്ങൾ വരാനും സാധ്യതയുണ്ട്. മാത്രമല്ല അസഹനീയമായ വിയർപ്പിന്റെ ദുർഗന്ധവും.. ചിലർക്ക് വിയർപ്പ് ദുർഗന്ധങ്ങൾ ഇല്ലാതെയായിരിക്കും. എന്നാൽ ചിലർക്ക് അങ്ങനെയല്ല. അതുകൊണ്ട് തന്നെ വിയർപ്പിന്റെ ശല്യത്തിൽ നിന്നും രക്ഷനേടാനുള്ള ചില മാർഗങ്ങൾ അറിയാം..

ഏരിവുള്ള ഭക്ഷണപദാര്‍ത്ഥങ്ങള്‍ കഴിക്കുന്നത് ശരീരത്തില്‍ കൂടുതല്‍ വിയര്‍പ്പ് ഉണ്ടാക്കും. പ്രത്യേകിച്ച് പച്ചമുളക്, മസാലകള്‍ എന്നിവ അധികം കഴിക്കുന്നത് നല്ലതല്ല. അതുപോലെ തന്നെ വെളുത്തുള്ളി സവാള തുടങ്ങിയവ അധികമായി ഭക്ഷണത്തില്‍ ഉള്‍പ്പെടുത്താതിരിക്കാനും ശ്രദ്ധിക്കണം, ഇവ വിയര്‍പ്പിന്റെ ദുര്‍ഗന്ധം വര്‍ദ്ധിപ്പിക്കാന്‍ സാധ്യതയുണ്ട്. അതുകൊണ്ട് ഇത്തരം ഭക്ഷണ വസ്തുക്കൾ ഒഴിവാക്കാൻ ശ്രമിക്കണം.

നല്ല വായുസഞ്ചാരം ലഭിക്കുന്ന വസ്ത്രങ്ങള്‍ ധരിച്ചാല്‍ വിയര്‍പ്പിനെ പ്രതിരോധിക്കാം, കട്ടികുറഞ്ഞ കോട്ടണ്‍ വസ്ത്രങ്ങള്‍ തന്നെയാണ് നല്ലത്. അതുപോലെ ഷൂ ഒന്നും വേനൽ സനായത്ത് നല്ലതല്ല. കാരണം കാലുകൾ വിയർത്ത് ദുർഗന്ധം ഉണ്ടാകാൻ സാധ്യതയുണ്ട്.

ചൂട് കാലങ്ങളില്‍ ശരീരത്തിലെ അനാവശ്യരോമങ്ങള്‍ നീക്കം ചെയ്യാന്‍ ശ്രദ്ധിക്കുക. പ്രത്യേകിച്ച് കൈക്കുഴി എപ്പോഴും രോമങ്ങള്‍ നീക്കം ചെയ്ത് വൃത്തിയാക്കി സൂക്ഷിക്കണം. കാരണം ചൂടു കാലങ്ങളില്‍ ബാക്ടീരിയകള്‍ കൂടുതലായി ശരീരത്തില്‍ കടന്ന് കൂടാനും വിയര്‍പ്പും ദുര്‍ഗന്ധവും വര്‍ദ്ധിക്കാനും രോമങ്ങൾ കാരണമാകുകയും ചെയ്യുന്നു.

പഴച്ചാറുകളും, ശീതളപാനീയങ്ങളും, വെള്ളവും ധാരാളമായി കഴിക്കേണ്ടത് അത്യാവശ്യമാണ്. കാരണം ശരീരത്തിൽ ജലാംശം നിർത്തേണ്ടത് വളരെ ആവശ്യമാണ്.