മൊബൈൽ ഫോണില്ലാത്ത ഒരു ജീവിതത്തെക്കുറിച്ച്‌ ചിന്തിക്കാൻ പോലും കഴിയില്ല ഇന്നത്തെ തലമുറയ്ക്ക്‌. എന്നാൽ മൊബൈൽ ഫോൺ ഉപയോഗിച്ച്‌ കടന്നുപോകുന്നവർ അറിയാതെ പോകുന്ന ഒന്നാണ്‌ പല രോഗങ്ങളും വരുത്തുന്ന ബാക്ടീരിയകളും വഹിച്ചാണ്‌ ഇവ നമ്മോടൊപ്പം നടക്കുന്നതെന്ന്‌. ഡയറിയ, ഫ്ളൂ എന്നിവ പിടിപെടാൻ മൊബൈൽ ഫോണുകളിൽ നിറഞ്ഞിരിക്കുന്ന രോഗാണുക്കൾ ധാരാളം. മൊബൈൽ ഫോൺ എപ്പോഴും നമ്മുടെ ചുണ്ടിനോടും ചെവിയോടും ചേർന്നിരിക്കുന്നു എന്നതാണ്‌ അപകടം. ഭക്ഷണം കഴിക്കുമ്പോൾ ഡൈനിംഗ്‌ ടേബിളിലും, ജിമ്മിൽ പോകുമ്പോൾ തൊട്ടടുത്തുമൊക്കെ സ്മാർട്ട്ഫോൺ വയ്ക്കുന്നവരാണ്‌ നമ്മൾ. ഇത്രത്തോളം നമ്മുടെ ശരീത്തോട്‌ ചേർന്നു നിൽക്കുന്ന മറ്റൊരു ഉപകരണവുമില്ല. ടച്ച്സ്ക്രീൻ ഫോണുകൾ ഉപയോഗിച്ചതിനു ശേഷം കൈകഴുകാതെയാണ്‌ ഭക്ഷണം കഴിക്കുന്നതെങ്കിൽ നിങ്ങൾ രോഗം ക്ഷണിച്ചു വരുത്തുകയാവും.

മൊബൈൽ ഫോണിലെ ബാക്ടീരിയകളെ പരിശോധിക്കാനായി നടന്ന ടെസ്റ്റിൽ അപകടകരമായ കണ്ടെത്തലാണുള്ളത്‌. 2700-4200 വരെ യൂണിറ്റ്‌ കോളിഫോം ബാക്ടീരിയയാണ്‌ മൊബൈൽ ഫോണുകളിൽ കണ്ടെത്തിയത്‌. ടോയ്‌ലറ്റുകളിൽ കാണപ്പെടുന്ന കോളിഫോം ബാക്ടീരിയകളുടെ യൂണിറ്റിനോളം വരുമിത്‌. മനുഷ്യന്റെയും മൃഗങ്ങളുടെയും വിസർജ്യങ്ങളിലാണ്‌ കോളിഫോം ബാക്ടീരിയ വലിയ യൂണിറ്റ്‌ അളവിൽ കാണപ്പെടുന്നത്‌. ഒരു യൂണിറ്റിൽ കൂടുതൽ കോളിഫോം ബാക്ടീരിയ കണെ​‍്ടത്തിയാൽ ആ വെള്ളം കുടിക്കാൻ യോഗ്യമല്ല എന്നാണ്‌ ലോകാരോഗ്യ സംഘടന പറയുന്നത്‌. മഞ്ഞപ്പിത്തത്തിനു പോലും കാരണമാകുന്നതാണ്‌ കോളിഫോം ബാക്ടീരിയകൾ.

എന്നാൽ ഈ കാരണങ്ങൾകൊണ്ട്‌ മൊബൈൽ ഫോണുകൾ ക്ളീൻ ചെയ്യാമെന്ന്‌ വിചാരിച്ചാലും എളുപ്പമല്ല. പ്രത്യേകിച്ചും സ്മാർട്ട്‌ ഫോണുകൾ. മാർക്കറ്റിൽ കിട്ടുന്ന മിക്ക ക്ളീനിംഗ്‌ പ്രൊഡക്ടുകളും സ്മാർട്ട്‌ ഫോണുകളുടെ ഡിസ്പ്ളേ തകരാറിലാക്കുന്നവയാണ്‌. വിലകൂടിയ സ്മാർട്ട്‌ ഫോണുകളുടെ ഡിസ്പ്ളേ തകരാറിലാകുന്നത്‌ എത്രത്തോളം ബുദ്ധിമുട്ടുകൾ സൃഷ്ടിക്കും. എന്നാൽ ഡിസ്പ്ളേയിൽ തകരാറുകൾ വരുത്താത്ത ഒരു മിശ്രിതം വീട്ടിൽ തന്നെ തയാറാക്കാവുന്നതുമാണ്‌. വിനാഗിരിയും വെള്ളവും സമാസമം ചേർത്തെടുക്കുക. ഈ മിശ്രിതം മാർദവമുള്ള തുണിയിൽ അല്പം മുക്കിയെടുത്ത്‌ ഫോൺ ഡിസ്പ്ളേ തുടച്ചെടുക്കുക. ഇത്‌ ബാക്ടീരിയയെ നശിപ്പിക്കാൻ സഹായിക്കുമെന്ന്‌ പറയപ്പെടുന്നു. എന്നാൽ ഡിസ്പ്ളേയിൽ യാതൊരു തകരാറു വരുത്തുകയുമില്ലെന്നാണ്‌ ഉപയോഗിച്ചിട്ടുള്ളവർ പറയുന്നത്‌. ഇങ്ങനെ ദിനവും ഫോൺ ക്ളീൻ ചെയ്യുന്നതാണ്‌ ആരോഗ്യകരമായ ജീവിതത്തിന്‌ ഉത്തമം