ഒന്നിരിക്കാൻ പാടുപെടുന്നവരെ കാണുമ്പോൾ സ്വാഭാവികമായും ആളുകൾ ചോദിക്കുന്ന കാര്യമാണ്, നിനക്കെന്താ മൂലക്കുരു ഉണ്ടോ എന്ന്.. ഒരു തരത്തിൽ പറഞ്ഞാൽ  ശെരിയാണ്.മൂലക്കുരു അഥവാ പൈൽസ് ഉണ്ടാക്കുന്ന വിഷമങ്ങൾ ചില്ലറയല്ല. ഒന്നിരിക്കാൻ പോയിട്ട് നിൽക്കാൻ പോലും സമ്മതിക്കില്ല ഈ വില്ലൻ. ജീവിതശൈലി രോഗമാണ് യഥാർത്ഥത്തിൽ പൈൽസ്. 

പക്ഷെ ആളുകൾ പുറത്തുപറയാൻ മടിക്കുകയും ചെയ്യും. മലവിസർജ്ജനത്തിനു ശേഷം പുകച്ചിൽ, രക്തസ്രാവം, വീണ്ടും വീണ്ടും പോകാനുള്ള തോന്നലൊക്കെ പൈൽസ് ലക്ഷണങ്ങളാണ്. സൂക്ഷിച്ചില്ലെങ്കിൽ ഇതുകൊണ്ട് നിങ്ങൾക്ക് ഉണ്ടാകുന്ന പ്രശ്നനങ്ങൾ ചെറുതല്ല. അതുകൊണ്ട് ഒന്ന് ഇപ്പോഴേ ശ്രദ്ധിച്ചാൽ മൂലക്കുരുവിനെ നിയന്ത്രിക്കാം.

മലദ്വാരത്തിലുണ്ടാകുന്ന വെരിക്കോസ് രോഗമാണ് പൈല്‍സ്. രക്തക്കുഴലുകളുടെ വികാസം മൂലമുണ്ടാകുന്ന ഒരു രോഗമാണ്. വികസിച്ച രക്തക്കുഴലുകള്‍ വീണ്ടും അമിതമായി വികസിക്കുകയോ മര്‍ദ്ദിക്കപ്പെടുകയോ ചെയ്താല്‍ അവ പൊട്ടി രക്തസ്രാവം ഉണ്ടാകും.

ഭക്ഷണ കാര്യത്തിൽ ഒരു നിയന്ത്രണം ആവശ്യമാണ്. എരിവ്, പുളി തുടങ്ങിയവ കൂടിയ ഭക്ഷണങ്ങൾ ഒഴിവാക്കുക. ഉരുളക്കിഴങ്ങ്, കപ്പ, ചേമ്പ്, മാംസം, കോഴിമുട്ട പോലുള്ളവയും ദഹിക്കാൻ പ്രയാസമുള്ള ഭക്ഷണങ്ങളും ഒഴിവാക്കണം. 

അമിതമായി ഭക്ഷണം കഴിക്കാതെ ധാരാളം വെള്ളം കുടിക്കാൻ ശ്രമിക്കണം. നാരുകൾ കൂടുതലായി അടങ്ങിയ ആഹാരങ്ങൾ കഴിക്കുവാനും ശ്രദ്ധിക്കണം. 

അതിനോടപ്പം, മലശോധനയ്ക്ക് പോകുമ്പോൾ അമിത സമ്മർദ്ദം ചെലുത്തരുത്. അധിക സമയം ടോയ്‌ലെറ്റിൽ തങ്ങുകയും വേണ്ട. ചെറുപ്പക്കാർ ഓഫീസിൽ ജോലികൾക്കിടയിൽ ഇടയ്ക്ക് ഒന്ന് എഴുന്നേൽക്കാൻ ശ്രമിക്കുക. കാരണം അധിക സമയം ഒരേ രീതിയിൽ നിൽക്കുകയോ ഇരിക്കുകയോ ചെയ്യുന്നത് നിങ്ങളുടെ ഞരമ്പുകളെ ബാധിക്കും. അതുകൊണ്ട് മൂലക്കുരുവിനെ ശ്രദ്ധയോടെ നിയന്ത്രിക്കാം