ചിലർക്ക് ദേഷ്യം വന്നാൽ പിന്നെ മുൻപും പിൻപും നോക്കില്ല, മൂക്കിൻ തുമ്പത്താണ് ദേഷ്യം എന്നൊക്കെ പറയുന്നത് കേട്ടിട്ടില്ലേ? കെട്ടും കണ്ടുമൊക്കെ പരിചയമുള്ള ഒരു കാര്യമാണ് ഈ ദേഷ്യം. സ്വാഭാവിക വികാരമാണെങ്കിൽ പോലും ചിലപ്പോൾ അതിരുവിട്ടു ദേഷ്യപ്പെടുന്നവർ  ചെന്നുപെടുന്ന പ്രശ്നനങ്ങൾ ചെറുതല്ല. പ്രശ്നനങ്ങൾ ഒഴിവാക്കണമെങ്കിൽ ദേഷ്യം പമ്പ കടത്തണം. അതിന് കുറച്ച് ഗംഭീര വഴികളുണ്ട്. 

എന്താണ് ദേഷ്യം? അതൊരു സ്വാഭാവിക വികാരമാണ്. നമ്മുടെ ഉള്ളിലെ സങ്കടം, സമ്മർദ്ദം, വീർപ്പുമുട്ടലൊക്കെ ഒന്നെങ്കിൽ കരച്ചിലിലൂടെയോ ദേഷ്യത്തിലൂടെയോ ആണ് പുറത്ത് വരിക. കരച്ചിൽ സഹിക്കാം. എന്നാൽ ദേഷ്യം അതിരുവിട്ടാൽ മൊത്തത്തിൽ ബുദ്ധിമുട്ടാണ്  സൃഷ്ടിക്കുക.

ദേഷ്യത്തിനെ പുറത്തെത്തും മുൻപ് പിടിച്ചുനിർത്തുക എന്നതാണ് ഒന്നാമത്തെ വഴി. നമുക്ക് ദേഷ്യം വരുമ്പോൾ ഹൃദയമിടിപ്പ് കൂടുകയും ആകെ വിയർക്കുകയും ഒക്കെ ചെയ്യും. അങ്ങനെ സംഭവിക്കുമ്പോൾ തന്നെ ആ അവസരം ഒഴിവാക്കണം. ഒന്നെങ്കിൽ അവിടെ നിന്നും മാറി നിൽക്കുക. അല്ലെങ്കിൽ ഒന്ന് ശ്വാസമെടുത്ത് ശരീരത്തിൽ ശ്രദ്ധ കേന്ദ്രീകരിക്കുക. ഒന്ന് മുതൽ പത്തുവരെ എണ്ണിയാലും മതി, ദേഷ്യം ഒന്നും തണുക്കും.

എന്തൊക്കെയാണ് ഒരാളെ ദേഷ്യത്തിലേക്ക് നയിക്കുന്ന കാര്യങ്ങൾ എന്ന് അയാൾക്ക് മാത്രമേ അറിയാൻ സാധിക്കൂ.അങ്ങനെയുള്ളപ്പോൾ അതിനെ സമാധാനപരമായി ഇരുന്നു വിശകലനം ചെയ്തു എഴുതി വയ്ക്കുക. എന്നിട്ട് അതിൽ നെഗറ്റീവ് ചിന്തകൾ കൊണ്ടുവരുന്ന കാര്യങ്ങൾ ഒഴിവാക്കി കളയുക. വളരെ എളുപ്പമല്ലേ,?

ഉള്ളിലൊതുക്കി അസ്വസ്ഥത സ്വയം അനുഭവിക്കരുത്. ആരാണ് നിങ്ങളെ മനസികമായി സമ്മർദ്ദത്തിലാക്കുന്നത് , അവരുമായി സംസാരിക്കുക. സംസാരിച്ച് പരിഹരിക്കാൻ ശ്രമിക്കുക. അതിനു സാധിച്ചില്ലെങ്കിൽ അടുത്ത സുഹൃത്തിനോടോ ഭാര്യയോടോ ഭർത്താവിനോടോ ഒക്കെ പങ്കുവയ്ക്കണം. 

മാനസിക സമ്മർദ്ദം ഉണ്ടാകുന്നത് ദേഷ്യത്തിന്റെ ഒരു പ്രധാന ലക്ഷണമാണ്.  ചിലപ്പോൾ അമിത പ്രതീക്ഷ കാരണം സമ്മർദ്ദം അനുഭവിക്കുന്നവരെ കണ്ടിട്ടില്ലേ? അങ്ങനെയുള്ളപ്പോൾ ഒന്നിനെയും പ്രതീക്ഷിക്കാതെ ജീവിക്കാൻ പഠിക്കണം. ദേഷ്യം വരാതിരിക്കാൻ സ്വയം അല്ലാതെ ആരാണ് ശ്രമിക്കുക. 

നമ്മുടെയൊക്കെ മാനസിക പ്രശ്നങ്ങൾക്ക് ഏറ്റവും നല്ല പരിഹാരം പാട്ട് കേൾക്കുന്നത് തന്നെയാണ്. പക്ഷെ ദേഷ്യം വരുമ്പോൾ പാട്ട് കേൾക്കാൻ ആരും ശ്രമിക്കാറില്ല. അപ്പോൾ ദേഷ്യം വരുന്നു എന്ന് തോന്നുമ്പോൾ പാട്ടൊക്കെ കേട്ട് അതിൽ അലിഞ്ഞ് ഒന്ന് ഉഷാറാകാം..