ഒരുപാട് ഗുണങ്ങൾ കോഫി നിങ്ങൾക്ക് നൽകുന്നുണ്ട്. ശാസ്ത്രീയമായി നോക്കിയാൽ കാൻസർ, പ്രമേഹം, വിഷാദം, കരളിന്റെ സിറോസിസ്, മുതലായവ തടയുന്നതിൽ കോഫിയുടെ പങ്ക് വളരെ വലുതാണ്. അതുപോലെ ആന്റിഓക്‌സിഡന്റുകളും പോളിഫെനോളുകളും കോഫിയിൽ ഉണ്ട്. എന്നാൽ ഇതിനൊക്കെ അപ്പുറം ഒരു പ്രഭാത ദിനചര്യയിൽ കാപ്പിക്കുള്ള സ്ഥാനം ഒഴിവാക്കാനാകാത്തതാണ്. 

കോഫി എല്ലാവര്ക്കും ഒരുപോലെ ആണോ? അല്ല എന്നാണ് ഉത്തരം. ചിലർക്ക് അത് ദോഷമൊന്നും വരുത്തില്ലെങ്കിലും ചിലരെ സംബന്ധിച്ച് ദോഷകരമായി ബാധിക്കും. നിങ്ങൾ തൈറോയ്ഡ് പ്രശ്നങ്ങൾ, ഉറക്കമില്ലായ്മ, ഉത്കണ്ഠ,  അല്ലെങ്കിൽ ഹോർമോണുമായി ബന്ധപ്പെട്ട അവസ്ഥകൾ എന്നിവയാൽ ബുദ്ധിമുട്ടുന്നവരാണെങ്കിൽ കോഫിയുടെ ദോഷവശങ്ങൾ അറിഞ്ഞിരിക്കേണ്ടതുണ്ട്. കോഫിയെക്കുറിച്ച് അത്ര അറിയപ്പെടാത്ത ചില വസ്തുതകൾ ഇതാ;

രക്തത്തിലെ പഞ്ചസാരയുടെ അളവ് വർദ്ധിപ്പിക്കുന്നു. കഫീൻ രക്തത്തിലെ പഞ്ചസാരയുടെ അളവ് വർദ്ധിപ്പിക്കുകയാണ്. ഹൈപ്പോഗ്ലൈസീമിയ ഉള്ള ആളുകൾക്ക് ഇത് പ്രത്യേകിച്ച് അപകടകരമാണ്.

നമ്മുടെ സ്ട്രെസ് ഹോർമോണായ കൂടുതൽ കോർട്ടിസോൾ പുറപ്പെടുവിക്കാൻ കോഫി അഡ്രീനലുകളെ പ്രചോദിപ്പിക്കും. അപ്പോൾ നമുക്ക് കാപ്പി കുടിക്കുമ്പോൾ ഊർജം അനുഭവപ്പെടും. എന്നാൽ നമ്മിൽ പലരും മനസ്സിലാക്കാത്ത കാര്യം, നമ്മുടെ ക്ഷീണിച്ച അഡ്രീനലുകളാണ് പലപ്പോഴും ഉറക്ക പ്രശ്നങ്ങൾ, വൈകാരികമായി ദുർബലത, വിഷാദം, ക്ഷീണം എന്നിവയ്ക്ക് കാരണമാകുന്നത്. അഡ്രീനൽ ക്ഷീണം അനുഭവിക്കുമ്പോൾ കാപ്പി കുടിക്കുന്നത് വിരോധാഭാസമാണ്.

ലെവോത്തിറോക്സിൻ (സിന്തറ്റിക് തൈറോയ്ഡ് ഹോർമോൺ) ആഗിരണം ചെയ്യുന്നതിനെ കോഫിയുടെ ഉപയോഗം സ്വാധീനിക്കും. അതുകൊണ്ടാണ് തൈറോയ്ഡ് രോഗികൾ കാപ്പി കുടിക്കുന്നതിന് കുറഞ്ഞത് ഒരു മണിക്കൂർ മുമ്പെങ്കിലും ഹോർമോൺ റീപ്ലേസ്‌മെന്റ്റ്  ഗുളിക കഴിക്കേണ്ടത്.

ഗർഭാവസ്ഥയിൽ കാപ്പി കുടിക്കുന്ന സ്ത്രീകൾക്ക് ഗർഭം അലസാനുള്ള സാധ്യത വളരെ കൂടുതലാണെന്ന് ചില പഠനങ്ങൾ സൂചിപ്പിക്കുന്നു.  അതുകൊണ്ട് തന്നെ സാഹചര്യങ്ങൾക്കും ശാരീരിക അവസ്ഥയ്ക്കും അനുസരിച്ച് വേണം കാപ്പി കുടിക്കുന്നത് ശീലമാക്കുവാൻ. ശീലമാണെങ്കിൽ ആരോഗ്യ സ്ഥിതിക്ക് അനുസരിച്ച് ഉപേക്ഷിക്കുകയും ചെയ്യണം.