നിറം മങ്ങുന്നത് സ്ത്രീകളെ സംബന്ധിച്ച് ഒരു വലിയ സൗന്ദര്യ പ്രശ്നം തന്നെയാണ്. വെയിലേറ്റ് മങ്ങുന്ന നിറം തിരികെ നേടാൻ ഒരു പാർലറിലും പോകണ്ട, കാശും ചിലവാക്കേണ്ട.. അടുക്കളയിലുണ്ട് മാർഗം.. ഒരു വഴിയല്ല, പല വഴികളുണ്ട്.. മുഖത്തിന്റെ ചർമത്തിന് അനുസരിച്ച് സ്വയം തിരഞ്ഞെടുക്കൂ..

തക്കാളിക്ക് എന്തെല്ലാം ഗുണങ്ങൾ ഉണ്ടെന്നോ..പഴുത്ത തക്കാളിയുടെ പകുതിയെടുത്ത് ഒരു ടീസ്പൂണ്‍ സോഡാപൊടിയും ഒരു ടിസ്പൂണ്‍ തേനും ചേര്‍ത്ത് നന്നായി അരയ്ക്കുക. ഈ മിശ്രിതം മുഖത്തിലും കഴുത്തിലും പുരട്ടി അഞ്ചു മിനുട്ട് കഴിഞ്ഞ് കഴുകിക്കളയാം.നിറം വര്‍ധിക്കാന്‍ ഏറ്റവും നല്ല മാർഗമാണ്.

ഇത്തിരി ഗ്ലാമർ കൂടണമെങ്കിൽ ഗ്ളാമർ കൂടിയ പഴങ്ങളും വേണ്ടിവരും.. ആപ്പിൾനിറം വർധിക്കാൻ ബെസ്റ്റാണ്. ആപ്പിൾ തൊലി നീക്കം ചെയ്ത ശേഷം 20 മിനുട്ട് നേരം പാലില്‍ മുക്കി വയ്ക്കുക. പിന്നീട് ആപ്പിള്‍ നന്നായി അരച്ചെടുക്കുക. ഇത് 10 മിനുട്ട് നേരം വീണ്ടും ഫ്രീസറില്‍ വച്ച് തണുപ്പിക്കുക. ഇതിലേക്ക് ഒരു ടീസ്പൂണ്‍ നാരങ്ങനീരും ചേർത്ത ശേഷം ഈ മിശ്രിതം മുഖത്തും കഴുത്തിലും പുരട്ടാം. 15 മിനുട്ടിനു ശേഷം തണുത്ത വെള്ളത്തില്‍ കഴുകിയ ശേഷം ഒരു ഐസ് ക്യൂബ് എടുത്ത് മസാജ് ചെയ്യണം. നല്ല മാറ്റമുണ്ടാകും.

കറ്റാർവാഴ മുടിക്കും ചർമ്മത്തിനും നല്ലതാണ്. 500 മില്ലി വെള്ളം എടുത്ത് അതില്‍ രണ്ടു ടേബിള്‍ സ്പൂണ്‍ കറ്റാര്‍ വാഴയുടെ നീരും അരമുറി നാരങ്ങപിഴിഞ്ഞതിന്റെ നീരും ചേര്‍ക്കണം. ഈ മിശ്രിതം തണുപ്പിച്ച് ഐസ് ആക്കുക. ഈ ഐസ് ക്യൂബുകൾ ദിവസേന മുഖത്ത് മസ്സാജ് ചെയ്‌താൽ നല്ല ഫ്രഷ് അനുഭൂതി ഉണ്ടാകും.