മാനസിക വികാരങ്ങളെ അടക്കി നിർത്തരുത്. അത് പ്രകടിപ്പിക്കാനുള്ളതാണ്. മറ്റുള്ളവരെ ദോഷമായി ബാധിക്കാതെ നമ്മുടെ ആശ്വാസത്തിനായി മാത്രം വികാരപ്രകടനങ്ങൾ നടത്തുന്നത് ആരോഗ്യകരമായ ഒരു കാര്യമാണ്. എന്നാൽ നിയന്ത്രണം വിടുന്ന ഒരു അവസ്ഥ വന്നാലോ? മറ്റുള്ളവരെ ഉപദ്രവിക്കുക, നിയന്ത്രിക്കാൻ സാധിക്കാതെ വരുക തുടങ്ങിയ കാര്യങ്ങൾ നിസാരമായ ഒരു വികാര പ്രകടനമല്ല. ഇത് മനോരോഗ ലക്ഷണമാണ്. 

നമ്മുടെ വികാരങ്ങളും ചിന്തയുമൊക്കെ നിയന്ത്രിക്കുന്ന തലച്ചോറിന്റെ പ്രത്യേക ഭാഗങ്ങളിൽ സംഭവിക്കുന്ന മാറ്റമാണ് മനോവിഭ്രാന്തിക്ക് കാരണമാകുന്നത്. അത് ശാരീരിക അവസ്ഥകളെ പോലെത്തന്നെ ചികിൽസിച്ച് ഭേദമാക്കേണ്ടതാണ്. എന്നാൽ മനോരോഗം എന്നാൽ ഭ്രാന്ത് എന്നതാണ് പലരുടെയും വിചാരം. ചങ്ങലയ്ക്കിടുന്ന അവസ്ഥയോ അലഞ്ഞു നടക്കുന്ന അവസ്ഥയോ മാത്രമല്ല മനോരോഗം. ഒരുപാട് തരത്തിൽ മനസിനെ ബാധിക്കുന്ന കാര്യങ്ങൾ മനോരോഗത്തിന്റെ വിഭാഗങ്ങളാണ്. ഇവ നിയന്ത്രിക്കാനാകാതെ വരുമ്പോളാണ് മേൽപ്പറഞ്ഞ രീതിയിലേക്ക് കാര്യങ്ങൾ നീങ്ങുന്നത്.

വൈകാരികാവസ്ഥയിലുള്ള കാര്യമായ തകരാറാണ് വിഷാദ രോഗത്തിലേക്കോ (Depression), ഉന്മാദാവസ്ഥയിലേക്കോ (Mania) ഉത്ക്കണ്ഠാരോഗത്തിലേക്കോ (Anxiety Disorder) നയിക്കുന്നത്. ചിന്താരീതിയിലുള്ള തകരാറാണ് OCD, Delutional disorder എന്നിങ്ങനെയുള്ള രോഗങ്ങളിലേക്ക് എത്തിക്കും. 

‘രണ്ട് തരം കാരണങ്ങള്‍’ കൊണ്ടാണ് ഒരാൾക്ക് മനോരോഗം വരുന്നത്. ഒന്ന് ജീവശാസ്ത്രപരമായ കാരണങ്ങളാണ്. അതായത്‌ ജനിതക ഘടനയുടെ പ്രത്യേകത. കുടുംബത്തിൽ ഒരുപാട് പേർക്ക് മാനസിക രോഗം വന്നിട്ടുണ്ടെങ്കിൽ അടുത്ത തലമുറകളിലേക്കും അത് കടക്കാൻ സാധ്യതയുണ്ട്. ചില കുടുംബങ്ങളെ കാണാറില്ലേ, നമ്മൾ തന്നെ അത്ഭുതപ്പെടും എന്താണിങ്ങനെ എല്ലാവർക്കും അസുഖം എന്ന്..

ഇതിൽ ജനിതക കാരണമില്ലാതെ പ്രസവവും ഗർഭവുമായുമൊക്കെ ബന്ധപ്പെട്ടും മനോരോഗ സാധ്യത നിലനിൽക്കുന്നു. ഗർഭകാലത്ത് അമ്മയ്ക്കുണ്ടാകുന്ന അസുഖങ്ങൾ, പ്രസവസമയത്തെ തകരാറുകള്‍ മൂലം കുട്ടിയുടെ തലച്ചോറിന് തകരാറുവന്നാലും, അത്തരം കുട്ടികള്‍ക്കു ഭാവിയില്‍ മനോരോഗസാധ്യത കൂടുതലാകാം. ജനിച്ച ശേഷം തലച്ചോറിനുണ്ടാകുന്ന ക്ഷതങ്ങളും ഭാവിയിൽ മനോരോഗത്തിന് സാധ്യത കൽപ്പിക്കുന്നു. 

രണ്ടാമത്തെ കാരണം മാനസിക സമ്മർദ്ദമാണ്. ഓരോ പ്രായത്തിലും ഓരോതരം കാരണങ്ങള്‍മൂലം ഒരു വ്യക്തിക്ക് മാനസികസമ്മര്‍ദ്ദമുണ്ടാകാം. ഒരു പ്രായത്തിലും വ്യത്യാസപ്പെട്ടിരിക്കും. പഠന ഭാരവും പ്രണയ നൈരാശ്യവും ജീവിതത്തിലെ തോൽവിയും, വാർധക്യത്തിൽ മരണ ഭീതിയുമെല്ലാം മാനസിക സമ്മർദ്ദത്തിന് കാരണമാകുകയും അത് മനോരോഗത്തിലേക്ക് നയിക്കുകയും ചെയ്യും.